19.02.2026
РАМОНТНЫЯ СУПОЛЬНАСЦІ – культура другога жыцця
POZNAN.gmroom.org працягвае прэзентацыю новых мап. Гэтая мапа прысвечана рамонтным супольнасцям Познані – ініцыятывам, якія вяртаюць рэчам функцыю і годнасць, а гараджанам даюць прастору для сустрэчы, супрацоўніцтва і ўзаемнай падтрымкі.
У падборку ўвайшлі месцы, дзе можна адрамантаваць ровары, бытавую тэхніку і электроніку, адзенне і тэкстыль, мэблю, цацкі, а таксама прыняць удзел у майстар-класах па шыцці, апсайклінгу і экалагічных практыках. Гэта і кавярні-рамонткі ў цэнтры горада, і сетка грамадскіх цэнтраў у розных раёнах, і студэнцкія ініцыятывы, і фонды, якія працуюць з пажылымі людзьмі.
Асобны кірунак складаюць прасторы, што спецыялізуюцца на роварах: тут можна бясплатна падладзіць тармазы, змяніць камеру, навучыцца самастойна даглядаць свой транспарт. Іншыя ініцыятывы дапамагаюць з рамонтам адзення і тэкстылю, вучаць шыццю і перапрацоўцы старых рэчаў у новыя. Ёсць таксама праекты, прысвечаныя рэстаўрацыі мэблі і аднаўленню цацак, якія даюць ім «другое жыццё».
Гэта мапа культуры клопату. Замест хуткай пакупкі новага – супольная праца; замест ізаляцыі – сустрэча; замест адходаў – працяг гісторыі рэчы.
Тэкст: Gray Mandorla Studio